తమిళ బిగ్‌బాస్ షో మరోసారి వివాదంలో చిక్కుకుంది. ఈసారి వివాదానికి కారణం హోస్ట్ విజయ్ సేతుపతి చేసిన కామెంట్స్. బిగ్‌బాస్ షోలోకి అడుగుపెట్టిన విజయ్ సేతుపతి.. హోస్టింగ్ విషయంలో తనదైన శైలిని చూపిస్తున్నారు. అయితే ఆయన చేసిన కొన్ని వ్యాఖ్యలు ఇప్పుడు రాజకీయంగా కూడా చర్చకు దారితీశాయి. బిగ్‌బాస్ షో అంటేనే వివాదాలకు కేరాఫ్ అడ్రస్. కంటెస్టెంట్ల మధ్య గొడవలు, వాళ్ల వ్యాఖ్యలు, టాస్కులు, ఎలిమినేషన్లు.. ఇలా ప్రతి వారం ఏదో ఒక అంశం సోషల్ మీడియాలో హాట్ టాపిక్ అవుతూనే ఉంటుంది. ఇప్పుడు హోస్ట్ చేసిన వ్యాఖ్యలు కూడా అదే స్థాయిలో చర్చనీయాంశంగా మారాయి.
విజయ్ సేతుపతి తన హోస్టింగ్‌లో ఒక సందర్భంలో ‘ఆలోచించకుండా హామీలు ఇవ్వ‌డం , సమస్య‌ల నుంచి పారిపోవడం, అపోజిషన్‌ను నిందించడం నాయకుడికి లక్షణం కాదు’ అన్నట్టుగా వ్యాఖ్యలు చేశారని ప్రచారం జరుగుతోంది. ఈ వ్యాఖ్యలు ఎవరిని ఉద్దేశించి చేశారనే దానిపై ఇప్పుడు చర్చ మొదలైంది. ముఖ్యంగా తమిళనాడు రాజకీయాల్లో విజయ్ సేతుపతి వ్యాఖ్యలకు ప్రాధాన్యం ఏర్పడింది. సేతుపతి కామెంట్స్ పై విజయ్ అభిమానులు, పార్టీ నాయ‌కులు మండిప‌డుతున్నారు. ఈ షోని బ్యాన్ చేయాల‌ని, లేదంటే విజయ్ సేతుప‌తిని హోస్ట్ నుంచి త‌ప్పించాల‌ని డిమాండ్ చేస్తున్నారు.
అసలు విజయ్ సేతుపతి ఏ సందర్భంలో ఆ మాటలు అన్నారు? అది నిజంగానే రాజకీయ నాయకుడిని ఉద్దేశించిన వ్యాఖ్యేనా? లేక బిగ్‌బాస్ హౌస్‌లో జరిగిన పరిణామాలపై సాధారణంగా చేసిన కామెంట్సేనా? అనేది ఇప్పుడు ఆసక్తికరంగా మారింది. విజయ్ సేతుపతి బిగ్‌బాస్ హోస్ట్‌గా బాధ్యతలు చేపట్టినప్పటి నుంచే ఆయన హోస్టింగ్‌పై భిన్నాభిప్రాయాలు వ్యక్తమవుతున్నాయి. గతంలో ఉన్న హోస్ట్‌ల తరహాలో కాకుండా.. తనకు సహజంగా అనిపించే విధంగా మాట్లాడటం, కంటెస్టెంట్లతో నేరుగా చర్చించడం, తప్పు అనిపిస్తే ప్రశ్నించడం వంటి విధానాన్ని ఆయన అనుసరిస్తున్నారు. అదే సమయంలో ఆయన చెప్పే మాటలు ఒక్కోసారి షో పరిధిని దాటి బయట కూడా చర్చకు దారితీస్తున్నాయి. ఇప్పుడు జరిగిన పరిణామం కూడా అలాంటిదే.
బిగ్‌బాస్ అనేది ఒక వినోద కార్యక్రమం. కానీ తమిళనాడులో సినిమా, టెలివిజన్, రాజకీయాలకు ఉన్న అనుబంధం కారణంగా ఇక్కడ సెలబ్రిటీలు చేసే ప్రతి కామెంట్‌కి ఒక ప్రత్యేకమైన అర్థం వెతకడం సహజం. విజయ్ సేతుపతి వ్యాఖ్యలు కూడా ఇప్పుడు అదే పరిస్థితిలోకి వెళ్లాయి. అయితే ఈ వివాదం ఎంతవరకు వెళ్తుందో చూడాలి. విజయ్ సేతుపతి తన వ్యాఖ్యలపై మరింత వివరణ ఇస్తారా? రాజకీయ పార్టీలు దీనిపై మరింతగా స్పందిస్తాయా? లేక వచ్చే ఎపిసోడ్‌తో ఈ వివాదం చల్లారిపోతుందా? ప్రస్తుతానికి మాత్రం విజయ్ సేతుపతి కామెంట్స్.. తమిళ బిగ్‌బాస్ షో చుట్టూ కొత్త వివాదానికి తెరతీశాయి. అయితే ఈ వ్యాఖ్యలు కేవ‌లం గేమ్ లో భాగంగా మాత్ర‌మే చూడాల‌ని, రాజకీయ ఉద్దేశ్యాలు లేవ‌ని విజయ్ టీవీ స్ప‌ష్టం చేసింది. బిగ్ బాస్ నిర్వాహ‌కులు కూడా ఈ వివాదం ఇంత‌టితో స‌మ‌సిపోవాల‌ని చూస్తున్నారు. మ‌రి ఏం జరుగుతుందో చూడాలి.
